D Burg Wildestei lit dört, wo d Donau dur die Schwäbischi Alb fliesst. Si ghört zur Gmeind Leibertinge im Landkreis Sigmeringe. Ihri hütigi Form, bsundrigs die vo der Ussenalag, isch praktisch gliich bliibe sit dr erste Helfti vom 16. Johrhundert, wo si under em Gottfried Werner vo Zimmere zun ere früehneuziitlige Festig umbaut worden isch. D Hauptburg und d Vorburg stöhn beidi uf künstlig abgschroffte Felse und me cha se nume über Brugge erreiche. Dr Halsgrabe, dr künstlig Grabe wo d Burgalag vo dr Umgäbig abschniidet, isch 20 Meter breit und ursprünglig 20 Meter dief gsi. Er het, wie dr berüehmti Stich vom Matthäus Merian em Eltere zeigt, scho in der Vergangeheit d Bsuecher vo der Burg sehr beiidruggt. Im Innere het d Burg grossflechigi Renaissance-Wandmolereie vo öbbe 1538 bis 1540 mit Blueme- und Vogelmotiv, und e Bilderzyklus vo dr Sigenotsag.